आज शौचालय दिवसः नेपालमा पनि बिबिध कार्यक्रम गरी मनाइँदै

काठमाण्डौ,४ मंसिर ।
विश्व शौचालय दिवस आज नेपालमा पनि बिबिध कार्यक्रम गरी मनाइँदैछ ।

सन् २०३० सम्म हरेक व्यक्तिको शौचालयमा पहुँच पुग्ने लक्ष्य तय गरिएको छ । विश्वमा अझै पनि दुई अर्ब ४० करोड मानिस शौचालयको पहुँच बाहिर रहेको विश्व स्वास्थ्य संगठनको तथ्याङ्कमा उल्लेख छ । हरेक १० मध्ये एक जनाले खुला ठाउँमा दिसा पिसाब गर्ने गरेको पनि तथ्याङ्कमा जनाइएको छ ।

सुरक्षित शौचालयको अभावमा हुने फोहोरका कारण झाडापखाला लागेर हरेक वर्ष विश्वमा एक लाख १५ हजार बालबालिकाको ज्यान जाने गरेको छ । घर र काम गर्ने ठाउँमा शौचालय नहुँदा व्यक्तिको स्वास्थ्य बिग्रने, काममा अनुपस्थित हुने र ध्यान केन्द्रीत गर्न नसक्ने भएकाले समग्र उत्पादकत्वमा नै असर पुग्ने भन्दै संयुक्त राष्ट्रसंघले सुरक्षित शौचालयको प्रयोगमा जोड दिएको हो ।

नेपाल खुला दिसामुक्त घोषणा भइसके पनि शौचालयको प्रभावकारी प्रयोग हुन सकेको छैन । बनाइएका कतिपय शौचालय पनि अव्यवस्थित र प्रयोगविहिन छन् । दिवसको अवसरमा आज देशभर विभिन्न कार्यक्रम हुँदैछन् ।

ललितपुरको मंगलबजारमा बनेको स्मार्ट सार्वजनिक शौचालयको आज मेयर चिरिबाबु महर्जनले उद्घाटन गर्ने कार्यक्रम छ । यो सार्वजनिक शौचालय अपाङ्गता भएका, वृद्धवृद्धा र महिलामैत्री पनि छ । महिलाहरुको महिनावारीमा प्रयोग हुने स्यानिटरी प्याड पनि मेसिनबाट आफैँ निकाल्न सकिने एरोसानकी सृष्टी महर्जनले जानकारी दिनुभयो ।

You might also like