काठमाडौं, २६ मंसिर
केपी ओली सरकारको सर्वसत्तावादका बिरुद्ध प्रदर्शनको तयारी गरेको नेपाली कांग्रेसले देशका प्रमुख १० शहरमा सम्बोधन गर्ने १० नेता र १० नारा तय गरेको छ ।
यही मंसिर २९ गते हुने बिरोध सभालाई संबोधन गर्न पार्टी सभापति सेर बहादुर देउवा मकवानपूर र बरिष्ठ नेता रामचन्द्र पौडेलले काठमाण्डौमा सम्बोधन गर्ने कार्यक्रम रहेको छ ।
देशैभर हुने प्रदर्शनमा केन्द्रीय कार्यालयबाटै प्रतिनिधि खटाएको हो । शीर्ष नेताहरूले देशका मुख्य सहरका प्रदर्शनमा सम्बोधन गर्न लागेका छन् ।
कांग्रेस प्रवक्ता विश्वप्रकाश शर्माका अनुसार सभापति शेरबहादुर देउवाले हेटौंडाको प्रदर्शनलाई सम्बोधन गर्ने कार्यक्रम छ ।
वरिष्ठ नेता रामचन्द्र पौडेलले काठमाडौं, उपसभापति विमलेन्द्र निधिले भक्तपुर, महामन्त्री शशांक कोइरालाले विराटनगर, कोषाध्यक्ष सीतादेवी यादवले ललितपुरको कार्यक्रमलाई सम्बोधन गर्ने कार्यक्रम छ ।
यस्तै सहमहामन्त्री प्रकाशशरण महत झापा, पूर्वउपसभापति गोपालमान श्रेष्ठ काभ्रे, पूर्वमहामन्त्री प्रकाशमान सिंह धनुषाको कार्यक्रममा सहभागी हुने जनाइएको छ । पूर्वमहामन्त्री कृष्णप्रसाद सिटौला महोत्तरी, नेताहरू चित्रलेखा यादव सप्तरी, रामशरण महत चितवन र अर्जुननरसिंह केसी पोखरामा हुने कार्यक्रममा सहभागी हुने कांग्रेस मुख्यसचिव कृष्णप्रसाद पौडेलले जानकारी दिनु भयो ।
केन्द्रीय सदस्यहरू गगन थापा कैलाली, प्रदीप पौडेल कञ्चनपुर, एनपी साउद अछाम जाने कार्यक्रम तय भएको छ ।
जिल्ला सभापतिहरूले माग गरेअनुसार केन्द्रीय सदस्यहरू जिल्लाहरूमा हुने प्रदर्शनमा सहभागी हुने कांग्रेस केन्द्रीय कार्यालयले जनाएको छ ।
उक्त दिनको प्रदर्शनका लागि केन्द्रबाटै दश वटा नारा तय गरि परिपत्र गरिएको छ । संघीय लोकतान्त्रिक गणतन्त्रका पक्षमा नारा लगाउन भनेको कांग्रेसले केपी शर्मा ओली नेतृत्वको सरकारलाई भने सर्वसत्तावादीको आरोप लगाएको छ ।
‘चारैतिर भ्रष्टाचार, जनताले चिन्यो ओली सरकार, जनता कोरोनाको मारमा नेकपा सत्ताको जितहारमा, औषधि छैन मल छैन सत्ताको लडाइँ, लाज छैन, बढ्यो महिला हिंसा र बलात्कार, अकर्मण्य भो ओली सरकार’ लगायत नारा केन्द्रबाटै तय गरिएका छन् ।
प्रदर्शनमा केन्द्रले तोकेकाबाहेक अरू नारा लगाउन नपाइने कांग्रेसले जनाएको छ ।
वरिष्ठ नेता रामचन्द्र पौडेललाई गत मंसिर १७ गते दमौलीमा पूर्वनिर्धारित कार्यक्रम अनुसार पुल उद्घाटन गर्ने क्रममा प्रशासन र नेकपाले अवरोध गरेपछि कांग्रेसले सरकारका प्रवृत्तिविरूद्ध आन्दोलन गर्ने घोषणा गरेको हो ।
सरकार सर्वसत्तावादको बाटोमा गएको कांग्रेसको आरोप छ । भ्रष्टाचार बढेको र कोरोना नियन्त्रण गर्न सरकार असफल रहेकोमा पनि कांग्रेसको विरोध छ ।
पछिल्लो समय राजावादीहरूले देशका विभिन्न सहरमा प्रदर्शन गरेपछि संघीय लोकतान्त्रिक गणतन्त्रमा नै खतरा हुन सक्ने भन्दै कांग्रेसले बेलैमा सचेत हुनुपर्ने बताउदै आएको छ ।
गत फागुनदेखि सार्वजनिक कार्यक्रम नगर्न मातहत निकायलाई निर्देशन दिएको कांग्रेसले कोरोना महामारीबीच सरकार बिरुद्ध प्रदर्शन गर्न लागेको हो ।