बुटवलको चौराहा–गोलपार्क सडक क्षेत्रका घर डोजर लगाएर भत्काइयो

बुटवल,२६ पुस ।
डिभिजन सडक कार्यालय बुटवलले बुटवलमा सडक क्षेत्रभित्र परेका घरमा डोजर लगाएर भत्काउन सुरु गरेको छ ।

सडक क्षेत्र मिचेर बनेका घर टहरा खाली गराउन अदालतले बाटो खोलिदिएपछि डिभिजन सडक कार्यालय बुटवलले आइतबार बिहानै बुटवलका सडक क्षेत्रभित्र परेका घरमा डोजर लगाएर भत्काउन सुरु गरेको हो ।

बुटवल–बेलहीया व्यापारिक मार्ग सडक विस्तार आयोजनाले सडक क्षेत्र मिचेर बनेका घर टहरा खाली गर्न दिएको २४ घण्टे अल्टिमेटमको समय सकिएपछि आइतबार बिहानदेखि डोजर लगाएर घर भत्काउन सुरु गरेको हो ।

उक्त म्यादमा केही घरधनीले सडक क्षेत्र मिचेर बनेका संरचना भत्काउन सुरु गरे पनि केहीले अटेर गरेपछि आइतबार बिहानै ठूलो संख्यामा प्रहरी परिचालन गरी बुटवलको ट्र्राफिक चोकबाट सडक मिचेर बनाएका घर टहरा भत्काउन सुरु भएको थियो ।
बुटवलको राजमार्ग चौराहादेखि गोलपार्कसम्मको सडक खण्डमा ३१० घर र बाँकी ४७ खाली जग्गा गरी ३५७ जनाले सडक क्षेत्र मिचेकोमा २ सय जनाभन्दा बढीले यसअघि नै घर भत्काइसकेका छन । उक्त सडक खण्ड ६ लेनको बनाउने क्रममा केही घरधनीले अदालतमा मुद्दा हालेपछि सडक विस्तारको काम डेढ वर्षदेखि रोकिएको थियो ।

घरधनीहरुको तर्फबाट नारायणीदेवि प्रधानलगायतका २४ जनाले अदालतमा मुद्दा हालेपछि सडक विस्तार रोकिएको थियो । तर, सर्वोच्च अदालतले पुस २० गते पछिल्लो रिट निवेदनमा गत असार ९ गते दिएको अल्पकालिन अन्तरिम आदेशलाई निरन्तरता दिन नपर्ने ठहर गरेपछि डिभिजन सडक कार्यालय बुटवललाई सडक विस्तार गर्ने बाटो खुलेको थियो ।

सर्वोच्च अदालतका न्यायाधीश सपना प्रधान मल्ल र डा. मनोजकुमार शर्माको संयुक्त इजलासले उक्त आदेशलाई निरन्तरता दिनु नपर्ने निर्णय गरेको हो ।
सडक क्षेत्र मिचेर बनाइएका घर टहर हटाउन पटकपटक आग्रह गरे पनि अटेर गरेपछि बाध्य भएर डोजर लगाएर भत्काउन थालेको डिभिजन सडक कार्यालय बुटवलका प्रमुख जयलाल मरासिनीले बताउनुभयो ।

डेढ वर्षअघि उच्च अदालत तुलसीपुर,बुटवल इजलासले पछिल्लो पटक जग्गाधनीहरुलाई जिल्ला प्रशासन कार्यालय मार्फत कानुनी प्रकृया पु¥याएर मुआव्जा दिएपछि मात्र सडक बिस्तार कार्य गर्नु भन्ने आदेशसँगै बुटवलको राजमार्ग चौराहादेखि गोलपार्कसम्मको सडक विस्तार अवरुद्ध भएको थियो ।

You might also like