काठमाडौँ २१ माघ
नेपाल कम्युनिष्ट पार्टी (नेकपा) प्रचण्ड माधव समूहले संवैधानिक परिषद्को नियुक्तिमा प्रधानमन्त्री केपी शर्मा ओलीले बलमिचाइँ गरेको भन्दै बिहिबार आम हडताल घोषणा गरेको छ ।
कार्यालय पेरिस डाँडामा बुधवार दिउँसो आयोजित पत्रकार सम्मेलनमा बोल्दै नेकपा प्रवक्ता तथा केन्द्रीय सङ्घर्ष समितिका संयोजक नारायणकाजी श्रेष्ठले प्रधानमन्त्री ओलीको बलमिचाइँका कारण आम हडताल गर्न आफूहरू बाध्य भएको बताउनु भयो ।
प्रवक्ता श्रेष्ठले भने,’ केपी ओली सरकारले प्रतिनिधि सभा विघटनको असंवैधानिक अलोकतान्त्रिक निरङ्कुश र प्रतिगामी कदम चालेपछि देश आन्दोलनमय रहेकै अवस्थामा बुधवार सरकार र राष्ट्रपति मिलेर असंवैधानिक एवम् गैर कानुनी ढङ्गले नियुक्त गरिएका संवैधानिक आयोगका पदाधिकारी एवम् सदस्यहरूलाई बलमिचाइँ गरी शपथ ग्रहण गराउने कार्य भएको छ । यसको विरोधमा हामी बाध्य भएर बिहिबार आम हडताल आह्वान गरेका हौ । ’
उहाँले प्रधानमन्त्री ओली सरकारी गुटको नेता मात्रै भएको आरोप लगाउनु भयो । ओली सरकार नीतिगत निरन्तरतामा भन्दा पनि भ्रम पार्न र स्वार्थ पूरा गर्न लागिपरेको उहाँको भनाइ छ ।
प्रचण्ड माधव पक्षको विरोधपछि पनि सरकारले विभिन्न संवैधानिक निकायमा सिफारिस भएका ३८ जनामध्ये ३२ जना पदाधिकारीहरूलाई बुधवार शपथ ग्रहण गराएको छ ।